مهاتما غاندي: بغض النظر عن ان ده مش اسمه وان اسمه معقد ويخليك تنساه بمجرد ما تقراه, بس الراجل ده عظيم. سياسي هندي كان قائد لحركة تقاوم الاحتلال بالعصيان المدني الشامل وبلا عنف.
استنى بس قبل ما تقفل المقال انا مش جايباك اكلمك عن غاندي عشان كلنا عارفين ان:
no one cares!
الراجل ده قال كلمة مميزة اوي:
be the change you want to see in the world
بالعربي: كن التغيير الذي ترغب ان تراه في العالم
لحد كده حلو الكلام؟ انهارده صحيت خير اللهم اجعله خير متفائلة لاسباب تتعلق كليا بالجو الشتوي اللي بعشقه والغيوم والامطار واول ما فتحت الفيسبوك لقيت صفحة حاطة الاقتباس ده وبعد تفكير عميق توصلت لان لو كل واحد فينا عمل كده اكيد هيحصل تغيير ومكنش هيبقى حالنا كده.
مثلا… انا تعبت من خناق الوالدة معايا عشان لما برجع من بره مش بحط هدومي مكانها! برميها عالارض او عالسرير كيفما اتفق بقى وهي تدخل اوضتي ويبدأ الصويت.
صحيت انهارده علقت هدوم امبارح و رتبت سريري والنتيجة كانت مرضية 😀
ممكن كلنا نطبق القاعدة دي في حاجات بسيطة اوي وبجد هتفرق معانا
عارفه البت اللي بتكرهيها اوي في الجامعه او في شغلك؟ جربي كده تروحي تضحكي في وشها ضحكة مش صفرا وتقوليلها بجد الطقم اللي انتي لابساه جميل عليكي. مش نفاق بس احسان على رأي حبيبنا احمد الشقيري. وادفع بالتي هي احسن
بس لو مرة في التانية لقيتيها لسه معووجة باللي في رجلك بقى واعدليها وربنا يقدرنا على فعل الخير 😀
زهقت من سواقة الناس وعدم التزامهم بقواعد المرور؟ طيب متقولش يعني هي جت عليا؟ التزم انت. هتتشتم في الاشارة وهتاخد تسعين الف كلاكس عشان تركب للعربية جناحات وتطير بس برده كبر مخك والتزم! مع الوقت هتلاقيها بقت عادة.
الفكرة ان احنا لو عاوزين بجد نغير العالم. لازم نغير من نفسنا الاول وهتلاقي نفسك بتشع طاقة ايجايبية تلمس كل اللي حواليك عاجلا ام اجلا! (ده انا عليا جمل!)
متبقاش انت مبوز وتسأل نفسك هي الناس مكشرة ليه؟
متبقيش انتي مش سايبه حد متكلمتيش عليه وتقولي الناس بتغدر وتغتاب بعض!
متبقاش انت مهمل ومتوقع مراتك تلم وراك او ولادك ينظفوا اوضتهم من نفسهم.
متطلبش من مراتك تبقى بشوشة ومتفائلة وانت داخل البيت بمشكلة طالع منه تبرطم!
وفي الاخر تختلف معايا او تتفق, تشوفني عايشه في عالم سمسم واحلامي وردية وساذجة, يبقى كلامي مجرد رأي ومحاولة متواضعه للتغيير 🙂 زمبؤلك كده: خليك غاندي 😀
آية